有情人终成眷属

有人话，通常过咗农历七月，都有一大堆恋爱中的情侣排住队等拉埋天窗，係结婚嘅好日子。咁嘅事终于喺我⋯⋯身边啲朋友度印证咗。（唔洗驚，我重未娶！）加上好多‘专业人士’都唔建议明年结婚，话唔係咁好日子喎。重有啲绰头呢——乜嘢999啊，20092009啊。搞到大家到赶住喺呢段时间行婚礼、办婚宴、搞注册。

来紧嘅十月到十二月之间，一共有五场婚宴等紧我去饮。其中两单重係咁啱得咁巧，喺同一晚接到通知嘅添！好彩五场都冇撞日子，唔洗搞到要做取舍，避过礼到人不到嘅尴尬场面。年尾個阵有堂大佬嗰婚礼；有一单係好朋友嘅哥哥；另外一场就係自小学一年级就识得嘅旧同学；其余两位，係今年正揾返嘅旧朋友，大家都係中学嗰阵参加同一届学生记者队时候认识嘅。

话事话，如果我唔係今年行桃花（唔係讲紧姻缘嗰啲，係人缘嗰种），有机会同埋啲旧同学、旧朋友重聚，都唔会有咁样嘅荣幸参加佢哋嗰婚礼。大家冇误会，我唔係呻紧有几唔好彩收到啲红炸弹！祇係有少少感触。原来当年大家响纪念册度写啲乜嘢‘有缘千里来相会’诸如此类嘅留言，唔係斋写来睇咁简单，真係有‘友谊万岁’咁嘅事嗰喎！

真係要多谢啲有心人，时不时搞吓啲大大小小嘅聚会啊、饭局啊、又或者係啲旅行团啊，俾大家有机会倾吓计、话吓家常，促进大家嘅友情。好彩呢個年代嘅科技咁发达，唔洗净喺靠飞鸽传书或者写信保持联络。短讯、email、facebook等，都好方便。事在人为，冇再揾籍口啦！喺呢個世界嘅某個角落，可能有呢啲朋友捻紧你嗰喎！

送俾大家呢两首靓歌。虽然旧咗啲，但係好听同有意义就得啦！本来捻住要upload谢安琪嘅《囍帖街》，但係捻捻吓，好似唔係几应景喎，重有少少攞景添。好啦，喺度祝大家：天下有情人终成眷属！